Бүгін Навальныйдың абақтыдан жасаған үндеуіне байланысты Мәскеуде метро станциялары жабылады

Мәскеу әкімшілігі Алексей Навальный жақтастары митингі өткізеді деген орындарды жауып тастамақшы. Аталған шара бүгін, 31 қаңтарда қала орталығындағы жеті метро станциясына кіретін және шығатын жолдарға қатысты.  Сонымен, таңғы 8-ден бастап «Александровский сад», «Охотный ряд», «Театральная», «Площадь Революции», «Кузнецкий мост», «Лубянка» және «Китай-город» станциялары жабылады. Бұл туралы Ресей ішкі істер министрлігінің Мәскеудегі бас басқармасы мәлімдеме таратты.

Сонымен қатар  қала басшылығы «ақпарат құралдарында және әлеуметтік желілерде рұқсат етілмеген шараларға қатысуға шақырған үндеу тарап жатқандықтан», жаяу адамдардың жүруіне де шектеу қойды. Полиция қосымша хабар таратқанша шектеу ережесі күшінде. Жұма күні полиция рұқсат етілмеген митингіге, шеру мен пикетке шақырғандардарға  қылмыстық жауапқа тарту қарастырылатынын айтып, ескерту жасаған.

Алексей Навальный жұма күні Мәскеудегі «Матросская тишина» тергеу изоляторынан тағы бір жаңа  видеоүндеу жариялады. Ол орыс ақыны Корней Чуковскийдің «Тараканище» өлеңін еске алып,  жақтастарын наразалық шараларын тоқтатпауға үндеді.

«Бассыздық пен жемқорлық жайлаған елде ешкім өмір сүргісі келмейді. Көпшілік біздің жағымызда. Соларды оятайық»  - дейді Навальный үндеуінде.

28 қаңтарда сот Алексей Навальныйды 15 ақпанға дейін тұтқындау туралы шешім шығарды. Саясаткердің адвокаттары Навальныйды тұтқындау кезіндегі негізгі адам құқықтары туралы Еуропа конвенциясының баптары бұзылғанын айтты.

23 қаңтарда Ресейдің ондаған қаласында қамалған оппозиция лидері Алексей Навальныйдың жақтастары жаппай митингке шықты.  Оны қодап, наразылық білдірген саны  250 мыңға жетті. 4 мыңға жуық шеруші ұсталып, тергеу комитеті  30-ға тарта қылмыстық іс қозғады.