Бүгін кешке Навальный Ресейге оралады

17 қаңтар күні кешке Алексей Навальный «Победа» әуе компаниясының рейсімен Мәскеуге ұшып келуі тиіс. Ресейдің оппозициялық саясаткерін «Внуково» әуежайынан жүзден астам адам күтіп алмақшы.  

Навальный тамыз айында улану салдарынан ес-түссіз күйі Германияға жеткізіліп, сол жақта бірнеше ай емделген. Еліне оралатыны туралы ол 13 қаңтар күні мәлімдеген болатын. Өткен айда Ресейдің жаза орындау жөніндегі федералдық қызметі оған Ресейге дереу оралуды талап етіп, келмеген жағдайда қамалатынын ескерткен.

Саясаткердің жақтастары мен жанашырларының арасында оны әзірге Ресейге келмей тұруға шақырып, қауіпсіздігіне алаңдайтындықтарын айтқандар көп болды. Ескертулерге қарамастан Навальный Германия ауруханасында есін жиып, журналистерге сұхбат бере бастағанда-ақ түбі Мәскеуге қайтатынын мәлімдеген. Ол шетелде қалып қойып Ресей президенті Владимир Путинге «үлкен сый» жасағысы келмейтінін, ондайға жол бермейтінін айтты.

Естеріңізге сала кетсек, 20 тамыз күні Томскіден Мәскеуге бағыт алған әуе рейсінде Навальныйдың хәлі күрт нашарлап, есінен танған. Ұшақ экипажы шұғыл шешім қабылдап, Омбы әуежайына қонған. Жедел жәрдем қызметі оны әуежайдан жергілікті ауруханаға алып барып өкпе желдету аппаратына қосқан. Саясаткер біраз уақыт комада болған. Навальныйдың жақтастары мен туыстары оны қасақана улады деген күдіктерін айтқан. Бірақ аурухана басшылығы улауды жоққа шығарды.

Екі күннен соң Навальныйды арнайы санитарлық авиациямен Германияға апарып, Берлиндегі «Шарите» клиникасына жатқызған. Германия билігі 2 қыркүйек күні Навальныйдың «Новичок» деп аталатын умен уланғанын мәлімдеді. 7 қыркүйек күні саясаткер комадан шығып, өкпе желдету аппаратынан ажыратылды.

Германия үкіметінің өтінішімен үш тәуелсіз зертхана Навальныйдан алынған үлгіде «Новичок» уының барын растады. Содан бері ол сауықтыру емін қабылдап, Германия ауруханасында болған.