Бүгін Қазақ телевизиясының хабар тарата бастағанына 63 жыл!

Осыдан 63 жыл бұрын 8 наурыз күні Қазақстанда алғашқы телевизиялық хабар таратыла бастады. Жалпы қазақ эфирі 1922 жылы негізі қаланған Қазақ радиосы мен 1958 жылы құрылған республикалық бірінші телеарнадан бастау алады.

1958 жылғы 8 наурыз күні Қазақстан Республикасы Телерадиокешені өз дәуірін бастады. Осы күні Алматы студиясында алғашқы хабар эфирге шықты. 15 наурыздан осы  студия ұдайы, апталық бес сағаттық хабар таратуға көшті.

Кейінгі жылдары республиканың басқа да қалаларына, бүкіл Қазақстан аумағына хабар таратыла бастады. 1960-шы жылдары негізінен футбол матчтарынан, концерттерден, мерекелік шерулерден тікелей хабарлар берілді.

 Қазақ телевизиясының бастауында көрнекті инженер Виктор Тюленев, Гүлжан Балпанбаева, радиотелеорталығының алғашқы директоры Рамазан Файзуллин және басқалар тұрды. Сол кездегі теледидар дикторлары телевизия  айнасына айналды.  

Қазақ теледидарының алғашқы дикторлары Нелли Омарова, Зұлқия Жұматова, Ләзиза Аймашева, Орынбала Оразбаева көрермендер құрметіне бөленді. Кейінірек олардың легіне Ласкер Сейітов, Мариам Айымбетова, Всеволод Иванов, Лидия Тельменко, Қажы Қорғанов, Тыныс Өтебаев қосылды.

Бүгінде «Қазақстан» телеарнасы - елдің ірі медиаресурсы. Техникалық жарақтандырылуы Қазақстан аумағын 100 пайызға дерлік қамтуға мүмкіндік береді, сондай-ақ Ресей, Қырғызстан, Өзбекстан, Түркіменстан, Қытай және Моңғолияның шекаралық аумағын қамтиды.

2011 жылғы 1 қаңтардан бастап «Қазақстан» ұлттық телеарнасы 100 пайыз қазақ тілінде хабар таратуға көшті.