Бүгін алаштың ақиық ақыны Мұқағалидың туған күні

Қазақтың лирик ақыны заманында лайық бағасын ала алмаса да өзінен кейінгілер үшін мәртебесі биік ақиық ақынға айналғаны сөзсіз.

Оның өлеңдері қазақтың өлең-сөзін жаңа заңғарларға көтерді. Бүгінде поэзия мұзбалағына арнап көркем фильмдер түсіріліп, түрлі мәдени шаралар атқарылып жатыр. Мұқағали Мақатаевтың өз дауысымен оқылған өлеңдері де алтын қорда сақтаулы. Ақын көзі тірісінде үнін тыңдар, мұңын шағар адам таппай  ренжігені де  рас.

Алайда қазір оның отты жырлары қазақ поэзиясын жаңа биіктерге көтерді. Ол қара өлеңнің Құлагеріне айналды. Көпшілік Мұқағали десе, оның ақындығын сөз етеді. Ал әкелік махаббатын балаларынан артық ешкім айта алмас.  Ұлы Жұлдыз «ақсақал, әкеміз, өте балажан адам еді» деп еске алады.

– Әкеміз өте балажан адам болатын. Ол кезде Қарасазда екі бөлмелі  үйде тұрдық. 10 жастағы баламын ғой, әлі есімде. Сол екі бөлменің біреуі толған әкемнің кітаптары болатын. Сол кітаптармен жұмыс істеді. Бір жағынан, тума талант болса, екіншіден  еңбекқорлығы басым еді. Қазіргі күні әкеміздің шығармашылығын дәріптеуде өзіміз де атсалысып жатырмыз- дейді ақынның ұлы Жұлдыз.

Былтыр ақиық ақынның 90 жылдық мерейтойында Мемлекет басшысы Қасым-Жомарт Tоқаев Тwitter парақшасында жазба қалдырған болатын.

– Бүгін – ақиық ақын Мұқағали Мақатаевтың туғанына 90 жыл. Мұқағали поэзиясы – күллі қазақтың болмыс-бітімі. Оның сырлы сезімге толы жырлары қалың оқырманның жүрегінен орын алды. Ақын мерейтойы Тәуелсіздігіміздің 30 жылдығымен тұспа-тұс келіп отыр. Бұл – әр қазақтың шаңырағындағы мерейлі той, - деп жазды Президент.

Сондай-ақ, былтыр ақынның 90 жылдығына орай елордада  «Тәуелсіздік сарыны» атты концерті өтті. «Астана» концерт залында ақиық ақын Мұқағали Мақатаевтың 90 жылдығына арналған «Есіңе мені алғайсың» атты кеш өтті.

Белгілі режиссер Болат Қалымбетовтың «Мұқағали» атты фильмі жарыққа шықты. Елордада тұсауы кесілген кинотуынды қазанның 21-інде ұлттық прокатқа шықты. Қазақтың ақиық ақынының 90 жылдығына орай түсірілген фильм ақын өмірінің соңғы жылдарын баяндайды. Сюжет Өскемен, Алматы, Санкт-Петербург, сондай-ақ Алматы облысында өрбиді. Сондай-ақ кинода Нұрғиса Тілендиев, Бауыржан Момышұлы, Фариза Оңғарсынова сынды заңғар тұлғалардың да бейнесі сомдалған. Фильм режиссері мұзбалақ ақын бейнесін үлкен экранға шығару үшін 15 жылдан астам уақыт еңбектенгенін айтты.

Сонымен қатар Мұқағали Мақатаевтың 90 жылдығына орай Хантәңірі мұзбалағының туған жері Қарасаздағы музейге ақынның қобызы тапсырылды. Нарынқол ауылында 50 отбасына жаңа үйлердің кілті тапсырылды. Ауылдың қақ ортасында ақынның  еңселі ескерткіші ашылды. Мерейтойлық  шара  «Хантәңірі» халық театры ақынның өмірі мен шығармашылығын негізге ала отырып дайындаған «Кең дүние, төсіңді аш, мен келемін» атты сахналанған көрінісімен ашылды.

Тау тұлғаның туған жері Қарасазда өткен ғылыми тәжірбиелік конференция өтіп, қайталанбас дарын иесінің күрескерлігі де сөз болды. «Алаш жұртының ақиығы» атты алқалы жиынға еліміздің жазушыларымен қатар Түркия және Қырғыз елінің ғалымдары, Түрксой ұйымының өкілдері қатысты. Олар ақын өлеңдері түбі бір түркі жұртына ортақ мұра екенін атап өтті.
Түркияның Анкара қаласында  Мұқағали Мақатаевтың есімі ұлықталып, «Және қайтып барасыңдар, тырналар» атты өлеңдер жинағының тұсаукесері өтті.

Сеулде Мұқағали Мақатаевтың 90 жылдығына арналған онлайн кеш өтті. Оған еліміздің 9 елдегі елшіліктері мен консулдық қатысты. Шетелдіктер Мақатаевтың өлеңдерін қазақ және ағылшын тілдерінде оқыды. Онлайн-әдеби кешке Үндістан, Вьетнам, Таиланд және Индонезия тұрғындары да қатысты.

Бүгінде  ақынға арналып деректі туындыдан бөлек бірнеше көркем фильм түсірілген. Шығармашылығы да дәріптеліп жатыр. Ақынға музей ашылып, мектептерге есімі берілді. Ақын атындағы көшелер де бар. Былтыр елордадағы ұлттық академиялық кітапханада Мұқағали Мақатаев атындағы мәжіліс залы ашылды. Заманауи жабдықталған залда ақын өлеңдерін QR кодты сканерлеу арқылы оқуға болады.