БҰҰ: түрмеде Covid-19 таралуына байланысты Джулиан Ассанжды босатуды сұраймыз!

БҰҰ-ның баяндамашысы Нильс Мельцер Ұлыбритания билігінен Wikileaks негізін қалаушы Джулиан Ассанжды коронавирус деректері тіркелген түрмеден тез арада босатуды сұрады, - деп хабарлайды РИА Новости.

«Ұлыбритания билігі алғашында Ассанжды Швецияның сексуалдық қылмыс күдігі бойынша қамауға алу туралы санкциясы негізінде ұстады. Кейінірек бұл дәлелдердің жоқтығына байланысты, айыптау ресми түрде алынып тасталды. Бүгін ол тек істің алдын алу мақсатында қамауға алынды. Ассанж сотталған қылмыскер емес және ешкімге қауіп төндірмейді. Сондықтан оның қатаң режимдегі түрмеде ұзақ уақыт оқшаулануы қажет те емес. Оған қолданылып отырған жазаның ешқандай заңды күші жоқ», - делінген БҰҰ-ның арнайы баяндамашысы Нильс Мельцердің мәлімдемесінде.

Ол Ассанж отырған түрмеде коронавирус ауруының тіркелуі ерекше алаңдаушылық туғызатынын атап өтті. Оның айтуынша, шамамен 160 тұтқынның 65-і «Cobid-19» жұқтырған.

Сонымен қатар сарапшы, Ұлыбритания билігінен АҚШ-та экстрадициялау туралы өтініш қаралып жатқан кезде Ассанжды босатуды немесе оны үй қамағына алып, денсаулығын қалпына келтіруге шақырды.

Бір жыл бұрын БҰҰ-ның арнайы баяндамашысы Джулиан Ассанж қамауға алынғаннан кейін денсаулығы нашарлап жатқанын мәлімдеген.

Джулиан Ассанж 2019 жылдың 11 сәуірінде АҚШ-тың өтініші бойынша британдық қатаң режимдегі түрмеге жіберілді. АҚШ билігі Ассанжға тыңшылық және құпия ақпаратты жария етпеу талаптарын бұзған 17 бап бойынша жаңа айып тағылғанын мәлімдеді. Егер Ассанж АҚШ-қа экстрадицияланатын болса 175 жылға дейін бас бостандығынан айырылуы мүмкін.

Экстрадициялау ісі бойынша тыңдау 2020 жылдың 7 қыркүйегінде басталды. Судья шешімі 2021 жылдың қаңтарында жариялануы мүмкін.