БҰҰ бас хатшысы келесі пандемияға дайындалуға шақырды

БҰҰ Бас хатшысы Антониу Гутерриш әлем халқын коронавирустан кейінгі жаңа пандемияға дайындалуға шақырды.

Жыл сайын әлемде 27 желтоқсан Халықаралық эпидемияға қарсы дайындық күні ретінде атап өтіледі. Оны БҰҰ Бас Ассамблеясы 2020 жылдың қарашасында жариялады.

– COVID-19 адамзат үшін соңғы індет болмайды. Біз келесі пандемияға дайындалуымыз керек. Халықаралық дайындық күнінде осы мәселеге назар аударайық және ол қажет ететін инвестицияны белгілейік, - деп жазды Гутерриш өзінің Twitter парақшасында.

Пандемия – бұл бірнеше елдер мен континенттерге әсер ететін ауқымды індет. ДДСҰ 2020 жылдың 11 наурызында коронавирустық инфекцияны пандемия деп жариялады.

Джонс Хопкинс университетінің мәліметтері бойынша 2021 жылдың 26 ​​желтоқсанында әлемде COVID-19 инфекциясының 279 миллионнан астам жағдайы тіркеліп, 5,3 миллионнан астам адам қайтыс болды. Ең қиын жағдайлар АҚШ, Үндістан, Бразилия және Ұлыбританияда тіркелді.