БҰҰ Бас Ассамблеясы Украина бойынша арнайы сессия өтетін күнді атады

Біріккен Ұлттар Ұйымы Бас Ассамблеясының Украина бойынша арнайы сессиясының өтетін күні белгілі болды.

Дүйсенбі, 28 ақпанда Украинадағы жағдайға қатысты қарар жобасын талқылау үшін БҰҰ Бас Ассамблеясының кезектен тыс сессиясы өтеді, деп хабарлайды ТАСС.

Бұған дейін АҚШ БҰҰ-ға жексенбі күні Қауіпсіздік кеңесін шақыру туралы өтініш жолдаған болатын. Оның аясында Украинадағы жағдай бойынша Бас ассамблеяны өткізу мәселесі бойынша процессуалдық дауыс беру өтетіні атап өтілді, деп хабарлайды басылым халықаралық ұйымдағы дереккөзге сілтеме жасап.

Сессия өтуі үшін Қауіпсіздік кеңесінің 15 мүшесінің тоғызы жақтап дауыс беруі керек, ал вето құқығы бұл жағдайға қолданылмайды.

Бұған дейін Украина президенті Владимир Зеленский Біріккен Ұлттар Ұйымының Бас хатшысы Антониу Гутерришпен сөйлескен кезде Ресейді БҰҰ Қауіпсіздік кеңесіндегі дауыс беру құқығынан айыруға шақырған.