«ҚазТрансОйлдың» жаңа басшысы Мәжілістің экс-спикерінің күйеу баласы екені белгілі болды

«ҚазТрансОйл» АҚ (ҚТО) жаңа басқарма төрағасы Талғат Құрманбаев Мәжілістің бұрынғы спикері, экс-энергетика министрі Бақтыкожа Ізмұхамбетовтің күйеу баласы екені белгілі болды.

«Талғат Құрманбаев Бақтықожа Салахитдинұлының қызы Айгүлге үйленген. Айгүл соңғы уақытқа дейін «ҚазТрансОйл» АҚ қазынашылығын басқарған» деп ҚазТАГ дереккөзі хабарлады.

 «ҚазМұнайГаз – Өңдеу және маркетинг» АҚ-ның 2017 жылғы еншілес компаниялар туралы есебіне сәйкес бұл тізімде шынымен де Талғат пен Айгүл, сондай-ақ Ізмұханбетовтың өзі де бар.

Құрманбаев 2000 жылы ҚазМЗУ-ды бітіргеннен кейін мұнай-газ саласында жұмыс істеді, 2015-2020 жылдары «Қазмұнайгаз-аэро» ЖШС бас директорының орынбасары болды. ҚТО басшысы болып тағайындалғанға дейін Энергетика министрлігінің мұнай өнеркәсібі департаменті директорының орынбасары болған.

23 ақпанда Құрманбаев ҚТО-ны басқарып, бұл қызметте Қазақстанның тұңғыш президенті Нұрсұлтан Назарбаевтың кенже қызы Әлия Назарбаеваның күйеуі Димаш Досановты ауыстырды. Досанов 14 қаңтардағы қаңтар оқиғасынан кейін ҚТО басшысы қызметінен босатылды.

Айта кетсек, 11 ақпанда ҚТО-ның жоғары басшылығынан тағы бір отбасының мүшелері - Әлен Таңатаров пен Шара Әділова бас директордың орынбасарлары қызметінен босатылған болатын.