Азия чемпионатында боксшылар Қазақстанға үш алтын әкелді

Иорданияның Амман қаласында өтіп жатқан Азия чемпионатының финалында тоғыз қазақстандық боксшының үшеуі алтыннан алқа тағынды.

Қазақстан құрамасына алтынды Санжар Тәшкенбай, Асланбек Шымбергенов және Айбек Оралбай әкелді, деп хабарлайды Olympic.kz.

48 келі салмақ дәрежесінде өнер көрсеткен Санжар Тәшкенбай жапониялық Аратак Казумадан мықты болды. 71 келіге дейінгі салмақта сынға түскен Асланбек Шымбергенов төрешілердің бөлек шешімімен иорданиялық Зеяд Ишайшты жеңді. 92 келіге дейінгі салмақта Айбек Оралбай өзбекстандық Мадияр Сайдрахимовты ұтты.

Сәкен Бибосынов (51 келіге дейін), Махмұд Сабырхан (54 келіге дейін), Серік Теміржанов (57 келіге дейін), Дулат Бекбауов (67 келіге дейін), Нұрқанат Райыс (75 келіге дейін) және Қамшыбек Құнқабаев ( 92 келіге дейін) чемпионатты күміс медальмен аяқтады.

Медальдық есептің қорытындысы бойынша Қазақстан Республикасының ерлер құрамасы Өзбекстаннан кейінгі екінші орынды алды. Бір күн бұрын бокстан Қазақстан әйелдер құрамасы да медальдық есепте екінші орынды иеленді.

Бірақ Қазақстан құрамасы 2022 жылғы бокстан Азия чемпионатында медальдар саны бойынша көш бастады, деп хабарлайды Sports.kz.

Қазақстан боксшылары барлығы 21 медаль жеңіп алды – алты алтын, жеті күміс және сегіз қола. Екінші орында 13 медальмен Өзбекстан құрамасы, үшінші орында 12 медальмен Үндістан.