Әзірбайжан мен Армения бейбіт келісімге қол қоя ма?

Әзірбайжан президенті Ильхам Әлиев Армениямен  бейбітшілік келісімі бойынша келіссөздерге рұқсат берді.

Оның айтуынша, Баку мен Ереван үшін бірнеше жылдан бері талқыланып келе жатқан бітімгершілік келісім бойынша жұмысты жалғастыратын уақыт жетті.

Оған Грузияның медиациясымен қол қою керек.

Ереван бұған келісетін болса, Грузияның арағайындығы арқылы Армения мен Әзірбайжан арасындағы бейбіт келісім бойынша «белсенді жұмысты» бастау қажет. Бұл туралы Тбилисиде Грузия премьер-министрі Ираклий Гарибашвилимен келіссөздер қорытындысы бойынша Әзірбайжан президенті Ильхам Әлиев мәлімдеді.

Әлиевтің айтуынша, Грузия Баку мен Ереван арасындағы қарым-қатынасты реттеуге қатысуы керек.

«Егер Армения келісімін берсе, Грузияда бірден екіжақты және үшжақты кездесулер басталады»,- деді Ильхам Әлиев.

Әлиев Грузияның елдердің тұтастығына қатысты «бейтарап ұстаным» ұстанатынын, сондықтан келісім бойынша жұмысқа тартылуы керектігін атап өтті. Ол сондай-ақ Гарибашвилиге делдал ретінде көмектесуге дайындығы үшін алғыс айтты.

4 қазанда Армения премьер-министрі Никол Пашинян Испанияның Гранада қаласында Ильхам Әлиевпен бейбіт келісімге қол қоюды жоспарлап отырғанын айтып, Әзірбайжан президентінің соңғы сәтте ол жаққа барудан бас тартқанына өкініш білдірді.

Баку кездесуге түрік өкілдерінің қатысуын талап еткенімен, одан бас тартылған. Атап айтқанда, Франция мен Германия бұған қарсы шықты. Агенттік келтірген тағы бір себеп Еуропалық кеңес басшысы Чарльз Мишельдің Бакудің әскери операцияны бастау шешіміне көңілі қалғанын білдірген мәлімдемесі болды.

Әзірбайжан аймақтың проблемаларын «одан алыс елдермен» талқылаудың пайдасы жоқ екенін атап өтті.

19 қыркүйекте Әзірбайжан Таулы Қарабақта «антитеррорлық операция» жариялады. 21 қыркүйекте тараптар атысты тоқтату туралы келісімге қол жеткізді.