Әзірбайжан қауымдастығының төрағасы Алғыс айту күнімен құттықтады

Әзірбайжандар қауымдастығының төрағасы Абилфас Хамедов қазақстандықтарды Алғыс айту күнімен құттықтады, деп хабарлайды Orda.kz порталы.

«Баршаға мәлім болғандай, бұл мереке – қан-қасап қуғын-сүргін, нәубет жылдарында ауыр азап шеккен халықтарға дархан да дара болмысымен құшақ жайған, дәм-тұзымен бөлісе отырып тағдыршешті тарихи қолдау көрсеткен қазақ халқына ризашылық білдіру күнімен қатар, еліміздегі тату-тәтті өмір сүріп жатқан барша азаматтардың, отандастардың өзара бауырластығын, достығы мен бірлігін, ынтымағын бекемдей түсетін, өзара ізет пен құрметтің жарқын үлгісін тек елімізде ғана емес, сонымен қатар күллі әлемге мақтанышпен паш ететін маңызды күн»,—деді ол.

 Айтуынша, бұл күннің маңызы мен мазмұны қазіргі таңда айрықша орын алып отыр.

«Еліміз президентіміз Қасым-Жомарт Тоқаевтың бастамасымен Әділетті Қазақстанды құру жолында. Бұл тұста, президентіміз бүгінгі құттықтауында айтып өткендей: «Осындай сындарлы сәтте елдік мүддені бәрінен биік қойып, ырыс-ынтымағымызды сақтау өте маңызды». Сондықтан да, бүгінгі бірегей мерекеге орай өзім басқаратын Әзірбайжандар қауымдастығы және өз атымнан еліміздің жарқын болашағы мен ынтымағы жолында тынбай еңбектеніп жүрген барша бауырларымызды, Қазақстан Халықтары Ассамблеясының барлық мүшелерін шын жүректен құттықтай отырып, Әділетті Қазақстан құру жолында ел президенті Қасым-Жомарт Тоқаевқа шын жүректен алғысымызды айтамыз және президентіміздің бастамаларын толық қолдайтынымды мәлімдеймін»,—деп толықтырды төраға.