«Азия дауысы» фестивалінің жаңа ашылымы өтті

Аты аңызға айналған халықаралық «Азия дауысы» фестивалі ұзақ жылдар бойы Орталық Азияның ғана емес, бүкіл Еуразия құрлығындағы  ең танымал фестиваль болды.

Әлем елдерінің өнерпаздары қатысатын өнер сахнасы  19 жылдан кейін қайта жаңғырды. Биылғы жаз алматылықтардың есінде  осы жаздың ең көп күттірген айтулы күні арқылы қалатыны сөзсіз. 

Жаңадан жаңғырған «Азия дауысы» фестивалі әдеттегідей «Медеу» мұз айдынында өтті. 1990 жылы Алматы тауының бөктеріндегі  дәл осы жерде «Азия дауысы» басталған болатын. «Медеу» мұз айдыны мен аттас шатқал қала тұрғындары мен қонақтарының сүйікті демалыс орынына айналғалы қашан. 

Фестивальдің танымал қонақтары арасында Мәдина Сүлейменова, Виктория Момынбаева, Құралай Нұрқаділова, Ерке Есмахан және «Алматы аруы-2023» Мәдина Алухановалар болды.

Сондай-ақ іс-шараға Ерлан Көкеев, Байғали Серкебаев және Кеңес Сейітов  сынды қазақ эстрадасының өкілдері қатысты.

Ашылу салтанатына  Мәдениет және спорт министрі Асхат Оралов,  «Халық банкі» басқарма төрайымы Үміт Шаяхметова, ұйымдастырушылардың бірі Арманжан Байтасов қатысты. 

Дәстүр бойынша жұртшылықтың ыстық ықыласына бөленіп жүрген Ботагөз Алдоңғарова мен Гүлнар Дусматова жүргізуші болды.  Сахна төрінде  алғашқылардың бірі болып Қазақстан Республикасы Мәдениет және спорт министрі Асхат Оралов құттықтау сөз сөйледі. 

Сонымен қатар «Халық» қоғамдық қорының басқарма төрайымы Үміт Шаяхметова сөз сөйледі.

Одан кейін сахнада Қазақстан өнерпаздарының жас буыны – ZAQ, Ерке Есмахан, RaiM, Мирас Жүгінісов, V $ XVPRiNCE, Орынхан, Молданазар және Ирина Қайратовна тобы өнер көрсетті. Іс-шара аспандағы әсерлі дрон шоуымен аяқталды. 

Фестивальдің екінші күні The Black Eyed Peas жеке концерт берді. Үшінші және соңғы күн әр жылдары «Азия дауысы» сахнасында өнер көрсеткен музыка таланттарына арналды. 

Үшінші күннің хедлайнері шведтік Secret Service тобының концерті болды. Бұл күндер аты аңызға айналған «Азия дауысы» фестивалінің қайта жандануының алғашқы серпілісі болып есте қалатыны сөзсіз.