Азаттық журналисінің үйіне ұры түсіп, ноутбук пен диктофонды алып кеткен

«Азаттық радиосының» журналисі Асылхан Мамашұлы үйін тонап кеткенін айтты. Оның құнды заттарын, ноутбугы мен диктофонын алып кеткен.

Асылхан Мамашұлының айтуынша, оқиға кешкі сағат 17:00 мен 21:00 арасында болған. Полиция қызметкерлері саусақ іздерін алып, тонау туралы арызды қабылдады.

— Үйде аса қымбат ештеңе жоқ: ақша да, алтын да. Кітап сөресін ашып, барлығын ақтарып, кітаптар арасынан ақша іздеген. Үйдің астаң-кестеңі шығып жатыр, - деді журналист.

Мамашұлы бұл тонауды өзінің журналистік мансабымен байланысы бар-жоғын білмейді, сонымен қатар ол бұл жерден саяси астар іздемейтінін жеткізді.

— Журналистік мансабыммен байланысты деп айта алмаймын. Мұндай жағдай жиі болады. Ноутбукты, диктофонды және штативтегі кішкентай камераны ұрлап кеткен. Әрине, оларға диктофонның неге керек болғанын білмеймін. Бәлкім ұры болашақта журналист болғысы келетін шығар, - дейді еңсесін түсірмеген Асылхан Мамашұлы.

Сонымен қатар, журналист соңғы уақытта «айқайы мықты дүниемен айналыспағанын» айтты.