Азаттық тілшілері сайлау учаскелеріне кіре алмады

10 қаңтар күні таңертең Алматы қаласы мен облысындағы сайлау учаскелерінен ақпарат тарату үшін барған Азаттық тілшілерін «ПТР-тест жоқ» деп сайлау учаскесіне кіргізбеген. Қаладағы №173 сайлау учаскесіне барған Азаттық тілшісі Аян Қалмұраттан өзін сайлау комиссиясының төрағасы ретінде таныстырған Нұржан Искаков ПТР-тест талап еткен. Бұл туралы Азаттық радиосы хабарлады, деп жазады ORDA.

Бұған дейін бас санитар дәрігердің қаулысында ақпарат құралдары өкілдерінен ПТР-тест талап етілмейтіндігі туралы жазған болатынбыз.

«Мен бақылаушы емеспін, ақпарат құрал өкілдерінің ПТР-тест тапсыруы міндетті емес дедім. Бірақ соған қарамастан «арандатпаңыз, шығыңыз» деп телефонымды жұлып алып, қолымды қайырып күшпен шығарып жіберді», - деді Аян Қалмұрат.

Осындай жағдай Алматы қаласындағы №350 және Алматы облысы Талғар ауданы Жалғамыс ауылындағы №894 және №893 сайлау учаскелерінде де қайталанған. Бас санитар дәрігердің қаулысына сүйенген Азаттық тілшісі Нұртай Лаханұлы сайлау комиссиясы өкілдеріне журналистерге ПТР-тест қажет еместігін айтса да, ақпарат таратуға мүмкіндік бермеген.

29 желтоқсанда бас санитар дәрігердің қабылдаған қаулысына сәйкес, сайлау кезінде тек партияның сенімді өкілдері, сайлау комиссиясы мүшелері мен бақылаушылардың ғана ПТР-тестен өтуге міндеттелген. Бұқаралық ақпарат құралдарын өкілдеріне ПТР-тестен өту туралы айтылмаған.