Қазақстанға Чехиядан 40 Пржевальск жылқысы әкелінбек

Жылқылардың алғашқы партиясын тасымалдау 2024 жылға жоспарланған.

Прагада Пржевальск жабайы жылқыларын Қазақстанға көшіру жобасын жоспарлау бойынша халықаралық семинар өтті.

2023 жылдың сәуірінде Қазақстан мен Чехия үкіметтері арасында ұзақ мерзімді ынтымақтастық туралы меморандумға қол қойылды. Екі ел жабайы жылқылардың популяциясын жандандыруды жоспарлап отыр.

Жылқылардың бірінші партиясын тасымалдау 2024 жылға жоспарланғаны белгілі болды.

«Айта кетейік, жылқыларды тасымалдауды Чехияның Қоршаған ортаны қорғау министрлігімен бірлесіп Прага хайуанаттар бағы жүзеге асырады. Қазақстанға жылқыларды реинтродукциялау үшін «Алтын дала» мемлекеттік табиғи резерваты аумағы таңдалды. Жануарлар акклиматизацияның бірінші жылын ACБK реинтродукциялау орталығында өткізеді»  деп хабарлады ҚР Экология министрлігі Орман шаруашылығы және жануарлар дүниесі комитеті. 

Жалпы Еуропадан Қазақстанға 40 бас Пржевальск жылқысын тасымалдау жоспарлануда. Біздің елімізде бұл жануарлар жойылу алдында тұр.