Қазақстан БҰҰ-ның діни рәміздерді қорлауды айыптайтын қарарға қатысты

Қазақстан БҰҰ-ның діни рәміздерді қорлауды айыптайтын қарарының авторларының бірі болды, деп хабарлайды Қазақстан Республикасы Сыртқы істер министрлігінің баспасөз қызметі.

«Біріккен Ұлттар Ұйымының Бас Ассамблеясы конфессияаралық диалогты дамытуға және өшпенділік сөздеріне қарсы тұруға бағытталған қарар қабылдады. (...) Қазақстан БҰҰ-ның басқа 47 мүше-мемлекетімен бірге  қарарға қатысты» делінген мәлімдемеде.

Анықталғандай, қабылданған қаулы дініне немесе наным-сеніміне байланысты адамдарға қарсы зорлық-зомбылық әрекеттердің кез келген түрін айыптайды. Сондай-ақ құжатта діни рәміздерге, қасиетті кітаптарға, тұрғын үйлерге, жұмыс орындарына, мүліктерге, мектептерге, мәдениет үйлері мен ғибадат орындарына қарсы бағытталған кез келген әрекеттерді айыптауға назар аударылды.

Жарияланған ақпаратқа сәйкес, БҰҰ қарарының мәтініне діни рәміздер мен қасиетті кітаптарға сілтемелерді енгізу туралы шешім Еуропа елдерінде Құран Кәрімді өртеп, қорлау оқиғаларының жиілеуіне байлнысты қабылданған.