Қазақстан Ауғанстанмен сауда айналымын арттырады

2 тамыз күні ҚР Премьер-Министрінің орынбасары – сауда және интеграция министрі Серік Жұманғарин мен Ауғанстанның сауда және өнеркәсіп министрі Алхадж Нұриддин Азизи ынтымақтастықтың негізгі түйіндерін талқылады.

«Қазақстандық компаниялардың Кабулға соңғы сапарының қорытындысы бойынша біздің энергетикалық сусындарымыз, ұн өнімдері, минералды тыңайтқыштардың алғашқы жөнелтілімі болды, күнбағыс майына да қызығушылық бар. Ауғанстаннан импортта ауылшаруашылық өнімдерімен қатар тоқыма бұйымдары пайда болды. Белсенділік танытатын  жұмыс бағытымыз бар» деді Серік Жұманғарин.  

Ауған тарапына Герат қаласындағы Қазақстанның сауда үйінің әлеуетін пайдалану және Қазақстанда өзінің сауда өкілдігін ашу ұсынылды.

Биыл сәуір айында қазақстандық делегацияның Кабулға барған сапарынан кейін «Қазақтелеком» АҚ Ауғанстанға коммерциялық негізде талшықты-оптикалық интернетті жеткізуге ауған тарапымен келісімшартқа қол қойды.

Үкіметтің баспасөз қызметі хабарлағандай, Қазақстан мен Ауғанстан білім беру бағытында да ынтымақтасады. Бүгінде әл-Фараби атындағы ҚазҰУ Ауғанстанның 130 студенті білім алуда.