Азаптау фактілері бойынша күштік органдарының 17 қызметкері сотталды – Бас прокуратура

Бүгін Бас Прокурор Берік Асыловтың төрағалығымен 2023 жылдың бірінші жартыжылдығындағы жұмыс қорытындысы бойынша Бас прокуратура алқасының кеңейтілген отырысы өтті.

Бас прокуратураның баспасөз қызметі хабарлағандай, өткен кезеңде ел бойынша қылмыс деңгейі 17% - ға (74650-ден 61442-ге дейін) төмендеген.

Аймақтардағы қылмыстық жағдайға нақты әсер еткен 10 ұйымдасқан қылмыстық топтың жолы кесіліп, синтетикалық есірткі өндіретін 30 зертхана жойылған.

Бас Прокурор азаптаумен және басқа да қатыгездікпен күресуге баса назар аудара отырып, алдын алудан бастап жазаның бұлтартпастығын қамтамасыз етуге дейінгі кешенді тәсілдің қажеттілігін атап өтті.

«Жалпы, азаптау фактілері бойынша күштік органдардың 35 қызметкеріне қатысты істер сотқа жіберілді. 17 адам сотталды» деп жазылған хабарламада.

Сондай-ақ Қадағалау және ден қою актілері бойынша мемлекетке 10 млрд теңге өтелді, 37 млрд теңге сомасына мүлік, 400 мың гектар жер қайтарылды.