«Азаматтықтан бас тартамын»: Түркістан облысы білім басқармасының басшысына үкім шықты

Шымкенттегі қылмыстық істер жөніндегі мамандандырылған ауданаралық сотында өткен жылдың ақпан айында Шымкент ДКНБ қызметкерлері ұстаған Жұмашевқа үкім шықты, деп хабарлайды Orda.kz.

Түркістан облысы білім басқармасының бұрынғы басшысы Ғалымжан Жұмашев Қазақстан азаматтығынан бас тартуға шешім қабылдады.

Бұл туралы ол өзіне үкім жарияланар алдында соңғы сөзін айтып жатып ашық мәлімдеді. Ол тергеу мен сот барысында әділетсіздік пен заңсыздықтар салдарынан осындай шешімге келгенін айтып түсіндірді.

Онымен бірге көк паспортпен қош айтысуға оның жұбайы Бану мен кәмелетке толмаған балалары да ниетті. Бастапқыда оған тек сыбайлас жемқорлыққа қатысты баптар бойынша айып тағылған еді.

Айыптаушы тарап жарыссөз барысында Жұмашевқа тағылған кейбір баптардан бас тартып, ақырында істе «ірі көлемдегі алаяқтық және қылмыстық жолмен алынған табысты заңдастыру» бабы ғана қалды.

Іс бойынша жәбірленуші ретінде екі рет сотталған, атышулы кәсіпкер әйел Эльмира Дүйсенқызы танылды. Ол: «пара берді» деп Ғалымжан Жұмашев пен  ҰҚКД -нің бұрынғы бірінші орынбасары Манат Сарбасовты айыптады. Сарбасовқа қатысты сот та дәл сол Шымкенттегі мамандандырылған соттың ішінде өтіп жатыр.

Дүйсенқызымен көп жылдан бері таныс екенін айтып, одан алған ақшасы пара емес, қайтарылған қарыздар деп мәлімдеді.

Сот оның бұл уәждеріне сенбей, прокурор пара беру және алу баптары бойынша айыптаудан бас тартса да, алаяқтық айыбын алып тастамады.

Ғалымжан Жұмашев ҰҚКД-нің тергеу изоляторында азаптауға ұшырағанын, өзін кінәсін мойындауға және қазіргі оқу-ағарту министрі Ғани Бейсембаевты «Түркістан облысы білім басқармасының басшысы қызметін алу үшін пара алды» деп жазбаша түрде айыптауға мәжбүрлегенін айтты.

Алайда сот бұл мәлімдемелерін ескермей, Жұмашевті кінәлі деп таныды.

Оған орташа қауіпсіздік мекемесінде 7,5 жыл бас бостандығынан айыру жазасы тағайындалды. Сондай-ақ оның отбасына тиесілі жекеменшік мектеп ғимараты мен жер учаскесі тәркіленетін болды.

Үкім заңды күшіне енген жоқ және шағымдануға жатады.