Азамат Сатыбалды Қазақфильм басшысы болып тағайындалды

Актёр Азамат Сатыбалды Шәкен Айманов атындағы «Қазақфильм» АҚ президенті болып тағайындалды.

Бұл туралы Мәдениет және спорт министрлігінің баспасөз қызметі хабарлады.

Киностудияның жаңа басшысын мәдениет және спорт министрі Асхат Оралов таныстырды. Ол «Қазақфильм» киностудиясының жұмысын үйлестіру маңызды да жауапты міндет екенін атап өтті.

«Мемлекет басшысының киностудия жұмысын жаңғырту жөніндегі тапсырмасын жүзеге асыру аясында 87 бірлік техникалық құрал сатып алынды. Жақын арада жаңғыртудың 2-ші кезеңін бастау қажет»деді Асхат Оралов.

Сондай-ақ, Асхат Оралов министрлік 2030 жылға қарай анимацияны қоса алғанда, жалпы кинопрокаттағы отандық фильмдердің үлесін 35 пайызға жеткізуді көздеп отырғанын айтты. Бұл ретте қазақ тіліндегі фильмдердің кассадағы үлесін 30 пайызға жеткізу мақсаты тұр. Министр жаңа басшы мен киностудия ұжымына табыс тілеп, табысты жұмыс болатынына сенім білдірді.

Еске салсақ, бұған дейін Азамат Сатыбалды Темірбек Жүргенов атындағы Қазақ ұлттық өнер академиясы ректоры қызметін атқарды.