Қазақ журналистикасы құнды еңбекпен толықты

21 қаңтарда Нұр-Сұлтанда ақпарат тарату саласына үлкен үлес қосқан Намазалы Омашевтың еңбегі жарыққа шықты. Бұл туралы Хабар24 хабарлады.

Аталған іс-шараға ғалымның түлектері мен замандастары қатысты. Кітап үш томнан тұрады. Жинақта қайраткердің публицистикалық шығармалары, ғылыми зерттеулері және мақалалары топтастырылған.

Н.Омашев – танымал публицист, оның мақалалары республикалық газет-журналдарда жарық көріп тұрады, радио және телебағдарламаларға жиі қатысады. Публицистің қаламынан туған жолсапар және портреттік очерктері мен түрлі эсселері, ғылыми-танымдық мақалалары мен деректі фельетондары оның шығармашылық дарыны мен публицистік шеберлігін айғақтайды.

Еске салсақ, Намазалы Омашев – Әл-Фараби атындағы Қазақ ұлттық университеті және Гумилев атындағы Еуразия ұлттық университетінде журналистика факультетінде маман даярлауға үлес зор қосқан тұлға.  

Н.Омашев әл-Фараби атындағы ҚазҰУ-дің журналистика факультетіне басшылық жасаған жеті жылдың ішінде факультет халықаралық деңгейге көтерілді. Факультет республикадағы барлық БАҚ-тарға журналист мамандар даярлайтын нағыз ұстаханаға айналды. Жеті кафедрада 80-ге жуық профессорлар мен оқытушылар қызмет атқарды. Факультетте радио-теле-фотостудия, компьютерлік класс, шағын баспахана, пароболистикалық антенна орнатылған ЮНЕСКО кафедрасы жұмыс істеді.