Қазақтың жас ғалымы коронавирус экспресс тестін ойлап тапты

Қазақ ғалымы, PhD, «Болашақ» бағдарламасының түлегі Болат Сұлтанқұлов COVID-19 індетін жылдам анықтайтын тест ойлап тапты. Экспресс тест зертханалық сынақтан сәтті өтті, енді клиникалық сынақ өткізу керек.

Жас ғалымның айтуынша, оған осы ой пандемия өршіп, індеттен адамдар қайтыс бола бастағанда келген. Сол уақыттарда ПТР тесттің нәтижесін ұзақ күту керек болатын. Салдарынан індет өрши түсті. Коронавирус індетін анықтайтын экспресс тесті әзірлеуге оның 6 ай уақыты кеткен. Ол тесті сала ғалымдарының кеңесіне сүйеніп, әзірлегенін айтты.

«Бұрын нанодене технологиясы туралы білетінмін, сол технологияны табу мақсатында шетелдік ғалымдармен пікір алмастым. Олардың қатарында Израиль, АҚШ, Иран, Швейцария ғалымдары бар. Соның ішінде швейцариялық ғалымдар сұрауымды қанағаттандырып, коронавирусқа қарсы нанодене технологиясын жіберді. Сол технологияны қолданып, індетті жылдам анықтайтын тест ойлап шығардым», - дейді Болат Сұлтанқұлов.

Ғалымның сөзінше, тест барлық жастағы адамдарға қауіпсіз. Тест сынамасына адамның сілекейі қолданылады. Тест коронавирус симптомы байқалған уақыттан  бастап 7 күннің ішінде анықтайды.  Болат ойлап тапқан тест ПТР және анти дене тесттеріне қарағанда арзан. Болаттың жаңалығына Назарбаев университеті қаржылай грант бөлді. Енді экспресс тестті нарыққа шығармас бұрын сараптамадан және сапасын дәлелдейтін тексерістен өткізу керек.