«Қазақтелеком» Алматы кеңсесіндегі тінтулер туралы ақпаратқа түсініктеме беруден бас тартты

«Қазақтелеком» АҚ Алматы кеңсесіндегі тінтулер туралы ақпаратқа түсініктеме беруден бас тартты.

«Біздің компания кеңселеріндегі ықтимал тінтулерге келетін болсақ, мұндай іс-шараларды өткізу және оларға түсініктеме беру тек құқық қорғау органдарының құзыретіне жататынын ерекше атап өткім келеді» деді «Қазақтелеком» АҚ коммуникациялар департаментінің директоры Сара Бәкірова.

Сондай-ақ, ол Қазақтелеком қалыпты режимде жұмыс істеп жатқанына сендірді.

Еске салсақ, 13 наурызда Қазақстанның тұңғыш президенті Нұрсұлтан Назарбаевтың немере інісі Қайрат Сатыбалдының лауазымдық өкілеттіктерін асыра пайдалану және «Қазақтелеком» АҚ қаражатын ұрлау фактілері бойынша Алматыда ұсталып, уақытша ұстау изоляторына қамауға алынғаны белгілі болды. Қазіргі уақытта Сатыбалдының мемлекет қауіпсіздігіне нұқсан келтіретін басқа да қылмыстарға қатыстылығы да тексеріліп жатыр.