Қазақ театры мен киносының абызы  Асанәлі Әшімов 85 жасқа толды

8 мамырда кеңестік және қазақ өнерінің ардагері, театр және кино режиссері, сценарист, педагог, Қазақстанның Еңбек Ері, Мемлекеттік сыйлықтың лауреаты, КСРО халық әртісі Асанәлі Әшімов 85 жасқа толды.

Актер 1937 жылы 8 мамырда Жамбыл облысы, Сарысу ауданы, Жайылма ауылында дүниеге келген. 1961 жылы Алматыдағы Құрманғазы атындағы Қазақ консерваториясының театр факультетін бітірген. 1961-1963 жылдары «Қазақфильм» киностудиясымен бірлесе жұмыс істеп, белсенді шығармашылық жұмысын осында бастады. Ол студент кезінде 1957 жылы «Ботагөз» фильмінде дебют жасады.

1963 жылдан Әуезов атындағы қазақ драма театрының актері, режиссері. 1987 жылдан 1988 жылға дейін сол театрдың көркемдік жетекшісі қызметін атқарды, сонымен бірге фильмдерге де белсенді түсті. Асанәлі Әшімов кино мен театрдағы рөлдерден бөлек Жүргенов атындағы Қазақ өнер академиясында оқытушылық қызметпен айналысты, профессор атағын алды.

2017 жылы оның сахнадан кетуге шешім қабылдағаны белгілі болды. Оның айтуынша, мұның бірнеше себебі бар: оны жұмыс істеуге ынталандыратын директор болған жоқ, етене жақын  серіктестері өмірден озған.

Актер «Дон Жуан, немесе геометрияға деген махаббат», «Ревизор», «Күн батар алдында», «Қозы Көрпеш – Баян сұлу», «Қарақыпшақ Қобыланды», «Еңлік-Кебек», «Ұрпақтарға өсиет»,  «Қан мен тер», «Абай», «Фудзиямаға шығу» т.б. спектакльдерінде ойнады.