Қазақстанның төрт аймағынан коронавирустың жаңа Eta штамы табылды

Денсаулық сақтау министрі Алексей Цой Қазақстан аумағынан нигериялық «Eta» штамы анықталғанын мәлімдеді.

Денсаулық сақтау министрі өзінің Facebook парақшасында денсаулық сақтау министрлігі ағымдағы жылдың шілде-тамыз айларында КВИ науқастарынан алынған оң зертханалық үлгілерді секвенирлеу әдісімен коронавирустық инфекцияға генетикалық зерттеу жүргізгенін айтты. 

— Секвенирлеу қорытындысы бойынша Қазақстанда 96 үлгіде штаммдар айналымы белгілі болды. Delta «үнді штамы» - 57 (59,4%), Alpha "британдық" - 24 (25%), «Ухань» коронавирусы - 10 (10,4%) және eta «Нигерия» - 5 (5,2%). Eta «Нигерия» штамы 4 өңірде табылды. Олар Қарағанды - 1, Маңғыстау - 2, Павлодар - 1, Нұр-Сұлтан – 1, - деп жазды министр. 

Негізінен «Eta» штамының пайда болуы 2020 жылдың желтоқсанында айтылды. Аурудың алғашқы жағдайлары Нигерия мен Ұлыбританияда анықталған болатын. 

«Eta» штамы Дүниежүзілік денсаулық сақтау ұйымының 2021 жылғы 15 қыркүйектегі ақпараты бойынша  әлемнің 77 елінде табылған. ДДҰ санатындағы «бақылауды» талап ететін штамдар қатарында.

Бұл жаңа штамның Alpha және Beta штамдарындағыдай: дене қызуы, жөтел, иіс пен дәм жоғалту, аурудың ауыр өтуі сияқты клиникалық белгілері бар.

— Осыған байланысты денсаулық сақтау министрлігі әрбір қазақстандықты өз денсаулығына, жақындары мен туыстарының денсаулығына қамқорлықпен қарауға шақырады. Инфекциядан қорғанудың және ауруханаға жатпаудың жалғыз тиімді әдісі – COVID-19-ға қарсы вакцинация. Сондай-ақ, вирустың таралу қаупін азайту үшін маска киіп, әлеуметтік қашықтықты сақтап, қол гигиенасы, үй-жайларды желдетіп вирустың барлық алдын-алу шараларын сақтау қажет, – деді Цой.