Қазақстанның бас онкологы Ресейде жоғары марапатқа ие болды

Еліміздің  онколог дәрігері Диляра Қайдарова ресейлік «Призвание»  сыйлығы иемденді. Ол Қазақ Ұлттық онкология және радиология ғылыми-зерттеу институтының басшысы. Жерлесіміз Ресейде  «Медицинаға жаңа бағыт әкелгені үшін»  номинациясын жеңіп алды.  

Жаңалықты Қазақ Ұлттық онкология және радиология ғылыми-зерттеу институты Facebook парақшасында жариялады. Ол «Призвание»  марапатын онкоұрықтану  бағдарламасы үшін алды. Онкоұрықтану бағдарламасы онкологиялық науқастардың репродуктивті қызметін жүзеге асыруға мүмкіндік береді. Шара медицина қызметкерлерінің күніне орай ұйымдастырылған.

Институт  мамандары соңғы жылдары онкологиялық науқастар көбейгенін алға тартады. Олардың ішінде жастар көп болғандықтан емдеу мәселесін ғана емес, жастардың бала сүюіне көңіл бөлінуі тиіс екеніне баса назар аударады. Сондықтан институтта бірнеше жыл бұрын онкологиялық науқастардың ұрықтану қабілетін сақтау бағдарламасы құрылып, науқастардың генетикалық материалдарын сақтайтын криобанк жасалған.

— Соңғы жылдары жастардың арасында онкологиялық ауру көбейді. Сондықтан олардың ұрықтану қабілетін сақтау, емделіп шыққан соң бала сүю мүмкіндігін дәл осы онкоұрықтану бағдарламасымен жүзеге асыруға болады. Қазақстанда бұл бағдарлама 10 жылда бері жұмыс істеп, елімізде 50-ге жуық сәби дүниеге келді. Бұл марапат біздің барша онкологтардың еңбегі, олар күн сайын науқастарға қатерлі ісікпен күресуге көмектеседі, - дейді Диляра Қайдарова.

Ресейдегі үздік дәрігерлерге арналған «Призвание» сыйлығы — Ресейдің басты медициналық марапаты. Жоба 2001 жылдан бері жыл сайын медицина қызметкерлерінің күні қарсаңында өтеді.