Қазақстанның азық-түлік қоры қанша айға жетеді?

Республика тұрғындарының негізгі азық-түлік өнімдерімен қамтамасыз етілуі туралы ҚР Ауыл шаруашылығы министрлігінде айтылды.

Бұл туралы Orda.kz хабарлады.

– Өңірлердің жедел мәліметтеріне сәйкес, 2021 жылдың 20 тамызындағы жағдай бойынша республикада жалпы көлемі 819 мың тонна әр түрлі азық -түлік қорлары бар. Оның ішінде өңдеуші кәсіпорындарда - 301 мың тонна, қоймаларда - 86,6 мың тонна, сауда желілерінде - 374 мың тонна, тұрақтандыру қорларында - 18,3 мың тонна тұр. Сондай-ақ, 495,7 млн жұмыртқа бар, - деді ҚР Ауыл шаруашылығы министрлігі.

Белгілі болғандай, жоғарыда аталған өнімдер 1-6 айға жетеді.

Министрлік апта сайын өңірлерді 32 негізгі азық-түлікпен қамтамасыз етуді бақылайды. Мониторинг кезінде тұрақтандыру қорларындағы, ірі сауда желілеріндегі, жеткізушілер мен өңдеу кәсіпорындарының қоймаларындағы қорлар ескеріледі.