Қазақстанның 16 өңірінде жолдар жабылды

Бір тәулік ішінде республиканың автожолдарында 155 бірлік техника жұмылдырылып, 294 адам эвакуацияланды. Бұл туралы КР ТЖМ ресми өкілі Талғат Уәли айтты, деп хабарлайды ORDA. ҚазАқпарат-қа сілтеме жасап.

16 өңірде дауылды ескерту жарияланды. Олар: Нұр-Сұлтан, Шымкент қалалары, Ақмола, Атырау, Алматы, Ақтөбе, Жамбыл, БҚО, Қарағанды, Қостанай, Павлодар, Қызылорда, Маңғыстау, СҚО және Түркістан.

ТЖМ ахуалдық орталығында құрылған жедел штабқа «Қазақавтожол» ЖШС және «ҚазАвтоЖол»ҰК АҚ қызметкерлері кірді. Республикалық штабтар Ақмола, Қарағанды, СҚО, Қостанай, Батыс Қазақстан, Атырау облыстары мен Нұр-Сұлтан қаласында жұмыс істейді.

Қазіргі таңда ауа райына байланысты республикалық маңызы бар автожолдардың 46 учаскесі және 14 өңірде 51 облыстық маңызы бар учаске жабылды. Аталған учаскелерге Нұр-Сұлтан қаласы, Ақмола, Ақтөбе, Алматы, Атырау, Батыс Қазақстан, Қарағанды, Қостанай, Солтүстік Қазақстан, Шығыс-Қазақстан, Павлодар, Маңғыстау, Түркістан, Жамбыл облыстары жатады.

Қостанайға - 87, Жамбылға - 70, Қарағандыға - 169, барлығы 316 бірлік автокөлік шоғырланған.

Халықты эвакуациялау үшін жабық жол учаскелерінде 473 жылыту пункті дайын. Қазіргі уақытта мұнда 138 адам орналастырылды.

ТЖМ аумақтық бөлімшелерімен 155 бірлік техника шығарылып, 294 адам эвакуацияланды. Оның ішінде 17 бала.

Шұғыл жұмыстарға ТЖМ, ІІМ, жол қызметтері, ЖАО барлығы 1189 адам және 788 бірлік техника жұмылдырылды.