Қазақстандық вакцинаны әзірлеуші ғалым: вакцина толығымен қорғамайды

Халықаралық вакцинология орталығының жетекшісі Қайсар Табынов өзінің екпе алса да коронавируспен ауырғанын мәлімдеді, деп хабарлайды Orda.kz.

Ғалым  коронавируспен ауырып, өкпесінің 35%-ын вирус зақымдағанын айтты. 

— Бірнеше күн бұрын ауруханадан шықтым, 10 күн бойы коронавирус дертінен емделдім. Біраз нәрсе білдім, тіпті кітап жазуыма болады. Алғашында 35%-ы зақымдалған өкпемен, 39 градус дене қызуымен «Халық Аренаға» түстім, кейіннен жөні дұрыс Алматыдағы фтизопульмонология орталығына ауыстырды, - деп жазды ол Facebook-тегі парақшасына. 

Ғалым-дәрігердің айтуынша, вакцина коронавирустан толығымен қорғамайды. Бұған оның осы ауруға шалдыққаны мысал. Сол себепті ол індеттен сақтану үшін жиі екпе салғызуға тура келетінін мәлімдеді. 

Зерттеуші осыдан он ай бұрын аустралиялық COVAX-19 вакцинасын салғызған екен. Оған қосымша ол өзі дайындап шығарған NARUVAX-C19/Nano вакцинасын да қабылдапты. 

— Алдағы уақытта менің ауруды қалай жұқтырғанымды анықтаймыз. Төсек тартып, жатып қалуыма себепші болған вирусты зерттейміз. Вакцинаның құрамын дамытуға болатын біраз дүниелер барын ұқтым, - дейді Қайсар Табынов. 

Ол қазақстандық ғалым дәрігерлердің коронавируспен дұрыс күресуді үйренгенін алға тартады. Табынбаевтың  сөзінше, жүре алмай қалған егде жастағы науқастарды біздің  дәрігерлер аяғынан тік тұрғызған. 

— Favipiravir препаратын қолдануға күмәнданып қалдым. Бұл дәрі менің бауырыма қатты әсер етті. Оның ағзадағы вирустың мөлшерін қаншалықты  төмендетуге сеп болғанын білмеймін. Менің аустралиялық серіктестерім ауырғанымды естіп, ивермектинді қолдануға кеңес берді. Бұл паразиттерге қарсы препарат вирустың үш нүктесіне соққы болады, - дейді дәрігер.