Қазақстандықты әлем чемпионаты алтынынан өз бапкері айырды ма?

Қазақстан чемпионы Алексей Дроздов ел біріншілігінде өз салмағында 295 келіні бағындырғанымен, Ташкентте өтетін әлем чемпионатына оны апармаған. Нәтижесінде небәрі 288 келіні бағындырған корейлік алтынға қол жеткізген.

Қазақстандық ауыр атлет, ауыр атлетикадан Қазақстан ұлттық құрамасының мүшесі Алексей Дроздов Ташкентте өтетін ауыр атлетикадан әлем чемпионатына іріктеу әділетсіз жүргізілгенін мәлімдеді. Спортшының жазбасы әлеуметтік желіде жарияланды.

Алексей Дроздов халықаралық дәрежедегі спорт шебері, Қазақстанның рекордсмені және жасөспірімдер арасындағы әлем чемпионатының жүлдегері екенін айтты. Оның айтуынша, бір ай бұрын өткен Қазақстан чемпионатында спортшы 61 келіге дейінгі салмақта рекорд орнатқан болатын.

Алексей Ташкентте өткен әлем чемпионатында кореялық спортшы жалпы салмағы 288 келіні бағындырып, алтын медаль жеңіп алғанын, ал қараша айында өткен Қазақстан чемпионатында оның жалпы салмағы 295 келіге жеткенін айтты.

«Мен ең жақсы формада болдым және қазір де жақсы формадамын. Әлем чемпионатында ең жоғары нәтижені жеңіл бағындыратын едім. Мені еш себепсіз қалдырып кетті. Мен бапкерлер құрамының шешіміне риза емеспін, олар мені апарамын деп, Арли Чонтейді алып кетті. Неге маған әділетсіздік танытты?» деп сұрады спортшы.

Бейне үндеудің ішінде екі видео бар: бірінде оңтүстіккореялық спортшы Ташкентте өткен әлем чемпионатында штанга көтеріп, сол арқылы алтын медаль жеңіп алса, екіншісінде Алексей Дроздовтың жаңа республикалық рекорд орнатқан сәті.

Еске салсақ, бұған дейін ұлттық құраманың сайланған, бірақ қызметіне кірісе алмаған бас бапкері Дәурен Бекмұханбетов те Алексей Дроздовты әлем чемпионатына неге апармағанына таң қалған.

Әзірге ауыр атлетика федерациясы ешқандай түсініктеме бермеді.