Қазақстандықтарды жаңбырлы демалыс күтіп тұр

Синоптиктер Қазақстанда 9-11 сәуірге арналған ауа райы болжамын ұсынды. Республиканың басым бөлігінде жаңбыр, тұман, жел күтіледі.

«Алдағы үш тәулікте Қазақстан аумағының басым бөлігінде оңтүстік циклонның және онымен байланысты атмосфералық фронтальды учаскелердің әсерінен ауа райының тұрақсыз сипаты сақталады – жаңбыр, республиканың солтүстік-батысында түнде - қар мен жаңбыр жауады» делінген «Қазгидромет» РМК хабарламасында.

Оңтүстік және оңтүстік-шығыс облыстарда кей жерлерде қатты жаңбыр жауып, найзағай ойнайды.

«Қазақстанның солтүстік, шығыс облыстары ғана солтүстік-батыс антициклонының ықпалында болады. Осыған байланысты мұнда жауын-шашынсыз ашық ауа райы және температураның біртіндеп көтерілуі күтілуде» дейді синоптиктер.

Республикада тұман түсіп, жел күшейеді.