Қазақстандықтардың зейнетақысы мен жәрдемақысы өседі

Маусым айынан бастап қазақстандықтар жоғарылатылған зейнетақы мен жәрдемақы ала бастайды. Бұл туралы  «Азаматтарға арналған үкімет«  Мемлекеттік корпорациясы хабарлады.

Бөлім ұсынған мәлімет бойынша, 2022 жылдың 12 мамырында қабылданған «2022-2024 жылдарға арналған республикалық бюджет туралы» Заңға сәйкес мемлекеттік әлеуметтік сақтандыру қорынан төленетін ынтымақты зейнетақы мен әлеуметтік төлемдердің мөлшері қосымша 4 пайызға индекстелді. Сондай-ақ, ең төменгі күнкөріс деңгейі мен айлық есептік көрсеткіш көлемінің өзгеруіне байланысты базалық зейнетақы мен жәрдемақы мөлшері 4 пайызға көбейді.

Заңға сәйкес 1 сәуірден бастап:

• Айлық есептік көрсеткіш - 3 180 теңге мөлшерінде;
• Ең төменгі зейнетақы - 48 032 теңге;
• Ең төменгі күнкөріс деңгейі - 37 389 теңге;
• Базалық зейнетақы төлемінің ең төменгі мөлшері - 20 191 теңге.

Енді қазақстандықтар маусым айынан бастап 2022 жылы енгізілген өзгерістер бойынша зейнетақы мен жәрдемақы алушылар қосымша ақысын ескере отырып, төлемдерді жоғары мөлшерде алатын болады.

Жоғарылайтын төлемдердің жалпы саны 6,6 млн-ға жетті. Зейнетақы мен жәрдемақылар мемлекет басшысы Қасым-Жомарт Тоқаевтың тапсырмасын орындау аясында индекстелді.