Қазақстандықтар жаппай Түркиядан баспана сатып алып жатыр

Қазақстанда ипотекалық бағдарламалар жабылып, шаршы метрдің құны өсіп жатқанда, халық Жерорта теңізі жағалауынан баспана сатып алып жатыр. Биылдың өзінде 1,5 мыңнан астам қазақстандық Түркиядан баспана сатып алған.

«Астана» телеарнасы атап өткендей, Нұр-Сұлтанда және бүкіл елде тұрғын үй құны азаматтардың кірісіне сәйкес келмейді. Биылдың өзінде жаңа үйлердегі пәтерлер 10-15 пайызға қымбаттады, екінші деңгейдегі тұрғын үйлер одан да қымбаттады.

Биыл 9 айдың ішінде 25 мың қазақстандық, басқа мемлекетке қоныс аударған. Әсіресе Түркия елін таңдағандар көбейген. Ресми дерек бойынша, жыл басынан бері 74 азамат Түркияға көшудің қамына кіріскен.

– Өзім бұрыннан армандаймын Түркияның өзі үлкен ғой және кішкентай қалашықтарында тұрғын үйің болса өте жақсы вариант. Қазақстанда үй алу мүмкін емес, өз ақшаңа... жас кезіңде. Ондай қаражат барлығында бар емес, - дейді Алматы қаласының тұрғыны Жазира Демеуова.

Сарапшылардың айтуынша, тамыз айында елдегі дайын баспананың шаршы метрі 388 мың теңгеден саудаланған. Олар құрылыс материалдарының қымбаттауы, бағаны үстемелетіп отыр деп түсіндірді.