Қазақстандықтар Украинадағы қақтығыс аймағынан шығарылуда

Қазақстан Республикасы Сыртқы істер министрлігінің қызметкерлері қазақстандықтарды әскери қақтығыс аумағынан шығару үшін демалыссыз және ұйқысыз жұмыс істеуде.

ҚР Сыртқы істер министрлігінің ресми өкілі Айбек Смадияров ведомство қызметкерлері мен қазақстандықтардың қандай жағдайға төзуі керек екенін баяндады.

 «Соңғы бірнеше күнде бүкіл әлем жұртшылығының назары Украинаға ауды. Киевтегі елшілігіміздің қызметкерлері күні-түні жұмыс істеуде. Олар Қазақстан азаматтарына көмектесіп қана қоймай, олардың тұратын елдеріндегі жағдай туралы да хабардар етеді»  деп жазды Айбек Смадияров Facebook парақшасында.

Ол көптеген келіссөздер жүргізуге тура келетінін, оның ішінде украиндық әріптестерімен де сөйлесіп жатқандарын  атап өтті. Польшаға бара жатқан және келе жатқан автобустарда халықпен қоян-қолтық  бірге жүрген қазақстандық дипломаттар бүгінде ұйқыдан қалған.

 «Біздің дипломаттарымыздың арасында  алғашқы күннен бастап бірінші болып топпен бірге сапарға шығып, тәулік бойы – 24 сағат демалыссыз және ұйқысыз өз қызметін ерлікпен атқарып жүрген  қыз бала бар екенін атап өткім келеді. Сіз оған телефон шалсаңыз, ол дереу жауап пен толық ақпарат  береді. Оның даусынан қобалжуды байқайсыз, бірақ ол оны көрсетпеуге тырысады. Польшаға келгеннен кейін ғана ол аздап босаңсып, көңіл-күйге бой алдырды. Алайда жарты сағаттан кейін ол чатта былай деп жазды: «Кешіріңіз, мен өз-өзіме келдім, тапсырмаңыз бар ма?». Лейла ханым, мен сізді қазақ дипломатиясының үлгілі өкілі ретінде білемін. Жақында елде кездесеміз деп ойлаймын. Ол қыз бала болғандықтан, біз оны оралушылар  рейсімен елге қайтарып жатырмыз» деп қосты Айбек Смадияров.

Сөз соңында Смадияров  әріптестері туралы айтып, дипломатиялық қызметтің кейбір қыр-сырын ашқысы келгенін түсіндірді.

Бір күн бұрын қазақстандықтардың біразы Польша шекарасынан өтіп үлгергені белгілі. Ал, Украина жағында адамдары бар бірнеше автобус кептелісте  қалды. Барша қазақстандықтар діттеген жеріне жеткен бойда арнайы ұшақпен Қазақстанға жөнелтіледі.