Қазақстандықтар бас санитарлық дәрігер Ерлан Қиясовты сотқа берді

Қазақстан тұрғындары республиканың бас санитарлық дәрігері Ерлан Қиясовты сотқа берді.

Бұл туралы Orda.kz хабарлады.

Диапазон басылымының айтуынша, үш ақтөбелік бірігіп, бас санитарлық дәрігердің үстіне арыз жазған. Оған себеп – жаңа қаулы.

Жаңа қаулыға сәйкес, жұмыс беруші қызметкерін жұмысқа кіргізбеуге құқылы.

Арыз жазушылар Ерлан Қиясов қаулыдағы тиісті тармақтарды алып тастауды талап етіп отыр. Олардың айтуынша, ол заңға қайшы.

– Ақтөбедегі сот Ерлан Қиясовтың Нұр-Сұлтанда жұмыс істейтінін анықтады. Ол даулы шешімді елордада шығарды, яғни істің өзі сол жерде қаралуы керек, - делінген хабарламада.

Арызды Нұр-Сұлтан қаласының мамандандырылған ауданаралық әкімшілік сотына беру туралы шешім қабылданды.

Еске салсақ, 6 қыркүйекте Қазақстанда Ерлан Қиясовтың жаңа қаулысы күшіне енді. Онда коронавирусқа қарсы вакцина алмаған адамдарды жұмыстан шығару туралы талап жазылған.