Балаларын велосипедпен тасыған азаматқа көлік сыйланды

Қызылордалық блогер Асылхан Дүкенбаев аязды күні балаларын велосипедпен тасып жүрген әкеге көлік әперуге ақша жинауды бастаған.

Әлеуметтік желілерде ер адамның күннің суығына қарамастан, балаларын велосипедпен тасып жүрген сәті түсірілген видео тараған еді. Кадрлардан үлкен ұлы велосипедтің алдында отырса, кішкентайы артындағы себетте бөкебайға оралған күйі ұйықтап жатқанын көруге болады.

Дүкенбаев оның отбасының уақытша үйде тұратынын, жеке баспаналарының жоқ екенін айтты. Ер адамның айтуынша, бұл видеоға түсіп қалған сәтте балаларымен ойын алаңдарының бірінен қайтып келе жатқан.

Айта кетейік, қала тұрғыны басында автокөлік сатып алуға ақша жинағысы келгендердің көмегінен бас тартқан.

Бізден де нашар өмір сүретіндер бар. Орташа өмір сүріп жатырмыз, аш емеспіз. Отбасымызға үлкен ықылас танытып, қамқорлық көрсеткен барлық жанашыр азаматқа алғыс айтамын, – деді ол.

Көпшіліктің атсалысуымен елдің ықыласына бөленген қызылордалық тұрғын көлік мінді. Бұл туралы блогер Асылхан Дүкенбаев instagram парақшасында жазды.

– Аманаттарыңызды табыстадым ағайын! Көлігіңіз құтты болсын, Қанеке. Енді осы көлікпен қос құлыншағыңызды қалаған жерге апарыңыз! Көп түкірсе көл деген осы шығар! Сіздерге Алла разы болсын! Алланың сүйікті құлы болыңыздар! Берген садақаларыңызды Алла еселеп қайтарсын. Қалған ақпаратты видеомен саламын! – деп жазды блогер парақшасында.