Қазақстандық профессор «Спутник V» вакцинасының кемшіліктерін атады

Қазақстанда коронавирус инфекциясына қарсы вакцина салу науқаны басталатыны айтылғанмен, екпенің жасқа қатысты талаптары нақты түсіндірілмеді. Бұл жөнінде 29 қаңтарда өткен брифингте Санитарлық-эпидемиологиялық экспертиза және мониторинг ғылыми-практикалық орталығының профессоры Әлім Әкімбаев мәлімдеді. Ғалымның айтуынша, тұрғындарға салынатын вакцинаның нұсқаулығында өндіруші вакцинаның жасқа байланысты шектеулерінің себебін нақтыламаған.

«Вакцинаны кімге салуға болатыны жөнінде нақты нұсқау  жоқ. «65 жасқа дейін» деген шектеу бар, бірақ оның себебін түсіндірмейді. Әсері болмай ма, әлде денсаулығын нашарлатып жібере ме? Ештеңе айтылмаған. Тым құрығанда қазіргі кезеңде екпеден не күтуге болатыны жайында нақты ұсыныстар болуы керек. Қазақстандық, ресейлік екпелер бойынша бізге нақты критерийлер керек. Кей жерлерде «60 жасқа дейін»  дейді. Нақтылық жоқ. «Мына жасқа дейін болмайды» деп жазса, оның себебін толық айтуы керек»,  деді профессор Әкімбаев.

Қазақстанның денсаулық сақтау министрлігі 18 бен 65 жас арасындағы азаматтарға коронавирусқа қарсы екпе салынатынын хабарлады. Дегенмен Қазақстандық «QazCovid-in» вакцинасы әлі толық сынақтан өткен жоқ. Денсаулық сақтау министрлігінің мәліметінше, Қазақстанда Covid індетіне қарсы жаппай вакцина салу науқаны 1 ақпанда басталуы тиіс. Халыққа сапасы мен қауіпсіздігі Батыс ғалымдарының күмәнін туғызған ресейлік «Спутник V» вакцинасы салынбақ. Шетел зерттеушілері екпенің клиникалық сынағының нәтижелері ашық жарияланбағандықтан, оның қорытындысына сенбейді.

Ал Әкімбаевтың айтуынша, нұсқаулығы бойынша  Ресей вакцинасына қарағанда, қазақстандық «QazCovid-in» екпесін сақтау шарттары жеңілірек.

Наурызда мектеп мұғалімдері мен университет оқытушыларына, ведомстволық медицина мекемелері өкілдеріне, сәуірден бастап мектеп-интернат, мектепке дейінгі мекеме қызметкерлері, студенттер мен созылмалы ауруы бар азаматтарға вакцина салынбақ.

Цойдың айтуынша, жыл соңына дейін 6 миллион адамға вакцина салу жоспарланған. Соның ішінде жылдың бірінші жартысында 2 миллион кісіге екпе салынбақ. Айларға бөлгенде: ақпанда – 100 мың, наурызда – 150 мың, сәуірде – 600 мың адам қамтылмақ.