Қазақстандық продюсер «Қазақстан халқына» қорының директорына шүйлікті

Қазақстандық продюсер Жан Мұқанов «Қазақстан халқына» қорының басшысы Болат Жәмішевке шүйлікті. Ол еріктілер ауру балалардың еміне ақша жинап, әлек болып жатқанда, оларға көмектесудің орнына қызметкерлеріне 500 мың жалақы қойған басшыны сынға алды.

- Осымен екі аптадан бері медиа тұлғалар СМА-ға шалдыққан балаларға миллиард тұратын екпе алу үшін ақша жинауда. 

Бәрін айтыскер ақын Айнұр Тұрсынбаева бастады. Ол желіде барлық танымал жандарды кішкентай қызға көмектесуге шақырып, үш күнде 300 млн теңге жинап, 1 млрд теңгені толықтырды.

Дана Есеева Эмилия есімді балапанға көмектесу үшін тәулік бойы желіде отыр. Қыз 2 жас 10 айлық. Ал екпені 13 келі салмаққа дейін салуға болады, одан кейін пайдасы болмайды. Ата-анасы 1 млрд теңгені жинай алмай жатқандықтан, қызды диетада ұстап отыр, - деп ашынды продюсер.

Мұқановтың айтуынша, қызға көптеген танымал адамдар көмектесуге тырысуда. Олар қарапайым халықтан 100-200 теңгеден жинап беруде. 
«Ақшаны халық жинап жатыр. 100, 200 теңгеден... Бұл оңай емес, дегенмен жанашыр халық тырысуда» деді продюсер.

Ол қор басшысы Жәмішевке сұрақ қойды:

«Қашанға дейін әрекет етпей, қарап отыра бермексіздер? Сіздер миллиардаған ақшаны жинап отырсыздар. Мұнда балаға көмек керек. Өйткені миллиард теңге тұратын екпе оның өмірін құтқарады. Сіздер неге үнсізсіздер?

Жәмішев мырзаға адам ретінде айтар назым жоқ. Бірақ қордың директоры ретінде шағымым бар. 

Қоғамдағы, желідегі толқуларға тез арада жауап берудің орнына бірінші кезекте қор командасына 500 мың теңге жалақы тағайындадыңыздар. Мемлекет басшысының айтуынша, бұл жыл балаларға арналады! Балаларға!

Жәмішев мырза, қорда не болып жатыр? Сіздер қайдасыздар? Халықтың алдына шығып, әрекеттеріңіз туралы айтып беріңіздер. Балалар өліп жатыр» деді Жан Мұқанов.