Қазақстандық паралимпиадашылар биатлоннан жарысады

Бейжіңде 2022 жылғы Қысқы Паралимпиада ойындарының төртінші күні басталды.

Бүгін қазақстандық парабиатлоншылар орта қашықтыққа отырып және тұрып финалдық жеке жарыста сынға түседі. Қазақстан атынан Сергей Усольцев пен Александр Герлиц қатысады.

Паралимпиада ойындарының төртінші күнінде әйелдер мен ерлер арасындағы орташа 10 шақырымдық қашықтықтағы жарыста медальдар сарапқа салынады. Бұған дейін 5 наурызда биатлоннан спринт жарысында біздің спортшылар қорытынды хаттамада 8 және 15-орындарға ие болған еді.

6 наурызда 18 шақырымдық қашықтыққа парашаңғымен сырғанау (отыру) жарысында қазақстандық спортшы Ербол Хамитов мәреге жетінші болып келді. Тағы екі спортшымыз Юрий Березин мен Денис Петренко мәреге 24 және 25-ші нөмірлермен келді.

Биылғы ойындардың басты фавориттері Қытай, АҚШ, Германия және Украина спортшылары. Үш жарыс күнінің қорытындысы бойынша Қытай құрамасы 25 жүлдемен медальдар тізімінде көш бастады: жеті алтын, сегіз күміс және он қола медаль; екінші орынды Украина құрамасы (4-3-1), үшінші орынды Канада (4-2-6) иеленді.