Қазақстандық композитор мен актер Түркияда «Тұран» деп аталатын клип түсірді

Түркияда Фатих Осман деген лақап атпен жұмыс істейтін қазақстандық композитор Ғаламат Бейсеқожа мен актер Ләдібек Тутадзе «Тұран» деп аталатын бірлескен клип түсірді. Жобаның музыкасын Ғаламат жазған болса, продюсері Ләдібек болды.

– Бұл жоба арқылы біз бүкіл түркі халықтарына өзіміздің тамаша тарихы бар біртұтас халық екенімізді, Ұлы Тұран ата-бабаларымыздың мұраты болғанын жеткізгіміз келді, - дейді Ләдібек пен Ғаламат.

Сондай-ақ, бұл өздерінің бірлескен бірінші жобасы екенін және болашақта тамаша жобалармен қуантатындарын да жеткізді.

Ғаламат Бейсеқожа – республикалық Ахмет Жұбанов атындағы дарынды балаларға арналған мектеп-интернаттың 10-сынып оқушысы. Республикалық «Жас Дарын» байқауының «Дәстүрлі өнер» номинациясы жүлдегері,  жыл сайын өтетін «Махамбет оқуларының» бас жүлдегері. Сонымен қатар, Семей қаласында өткен республикалық «Абай оқулары» байқауының бас жүлдесі, Ахмет Жұбанов атындағы халықаралық жас орындаушылар байқауының «ҚР халық әртісі, Мемлекеттік сыйлық лауреаты Қаршыға Ахмедияров атындағы сыйлықтың» иегері.

Ләдібек Тутадзе танымал актер. Ол түріктің «Ертұғырыл» телехикаясында басты рөлді сомдады.