Қазақстандық хоккейші қытайлықты ренжіткені үшін ойыннан шеттетілді

«Торпедо» (Өскемен) клубының хоккейшісі Стас Петросян қытайлық ойыншыға қатысты нәсілшіл қимыл көрсеткені үшін бір ойыннан шеттетілді.

Бұл туралы Orda.kz хабарлады.

«Торпедо» мен «Кунлун Ред Стар» командалары арасындағы президент кубогы матчында екі хоккейші - Стас Петросян мен Ян Ху арасында төбелес орын алды. Команданың Өскемендік өкілі қытайлық ойыншыға қатысты нәсілшіл қимыл көрсетті.

Қазақстан шайбалы хоккей федерациясы болған жағдайды қарастырып, Стас Петросянды бір ойынға қатысудан шеттету, сондай-ақ оған айыппұл салу туралы шешім қабылдады. Осылайша, хоккейші Қазақстан кубогының кезекті ойынына қатыса алмайды.

Петросянның өзі осы оқиға үшін кешірім сұрап, болған жағдай туралы өз нұсқасын айтып берді. Оның айтуынша, Ян Ху бірінші болып, оның ұлтын қорлаған. Ойыннан кейін хоккейшілер ымыраға келіп, қол алысты.