Қазақстан елшісі Әлібек Бақаев Рим Папасына сенім грамотасын тапсырды

Қазақстанның Ватикандағы елшісі (қызметін қоса атқарушы) Әлібек Бақаев Рим Папасы Францискке сенім грамотасын тапсырды, - деп хабарлады ҚР СІМ баспасөз қызметі.

Қазақстандық елші Әлібек Бақаев Рим Папасының Әлемдік және дәстүрлі діндер көшбасшыларының VII съезіне қатысып, Қасым-Жомарт Тоқаевтың жылы лебізімен қатар сенім грамотасын табыстап қайтты.

Рим Папасы елбасы Нұрсұлтан Назарбаевтың Әлемдік және дәстүрлі діндер көшбасшылары арасындағы сенім мен өзара түсіністікке негізделген диалог құру туралы бастамасының іске асырылуын жоғары бағалады.

«Бүгінде мүмкін бұрынғыдан да көп, жаһандану әлемі біздің планетамыздың алдында тұрған елеулі қатерлерге қарсы тұру үшін адамзатты біріктіретін және жас ұрпаққа арналған жарқын болашақты құра алатын шынайы және құрметті диалог пен ынтымақтастықта дамуы қажет», - деді Рим Папасы.

Сонымен қатар, келіссөзде Ватиканның Қазақстан елордасында өткен Әлемдік және дәстүрлі діндер көшбасшыларының съезіне қатысуы, мәдени-гуманитарлық байланыстарды кеңейту мәселелері қаралып өтті. Еліміздің Ватиканмен өзара қатынасы 1992 жылы 17 қазанда орнатылған. 1998 - 2009 жылдары Нұрсұлтан Назарбаевтың Ватиканға ресми сапарлары өтті, ал 2001 жылы елбасының шақыруымен Рим Папасы Иоанн Павел II Қазақстанға алғаш рет мемлекеттік пасторлық сапармен келген.