Қазақстандық дипломаттарға қойылатын талаптар күшейтілді

Депутаттар «Қазақстан Республикасының дипломатиялық қызметі туралы» Қазақстан Республикасының Заңына өзгерістер мен толықтырулар енгізу туралы» заң жобасын қарады.

Мемлекеттік тілмен қатар дипломаттарға шет тілдерді білу керек. Дипломатиялық қызметкерлер құқық бұзушылық жасаған кезде дипломатиялық дәрежені төмендету немесе айыру қарастырылады.

«Құжат елдің дипломатиялық қызметінің заңнамалық базасын жетілдіреді және реттейді. Жобада дипломатиялық сала ардагерлерін әлеуметтік қолдауға бағытталған нормалар да қамтылған. Қабылданған заң елдің дипломатиялық қызметінің тиімділігін арттыруға үлес қосады деп сенеміз», - деді Парламент Сенатының Төрағасы Мәулен Әшімбаев палатаның бүгінгі отырысында.

Сонымен қатар, сенаторлар «дипломатиялық қызмет ардагері» тұжырымдамасына өзгерістер енгізіп, осы санатқа жататындарды қайта қарауды ұсынды.

Депутаттар сондай-ақ елшілік қызметкерлеріне және олардың отбасы мүшелеріне дипломатиялық поштаны жеке пайдалануға арналған заттар мен жабдықтарды жіберу үшін пайдалану құқығын алып тастауды сұрайды.

Түзетулермен заң жобасы Мәжіліске қайтарылды.