Қазақстандық балаларға Pfizer екпесі салынады

Қазақстанға Pfizer екпесі жеткізілгеннен кейін жасөспірімдерге салу мүмкін болады.

Балаларды вакциналау олардың ата-аналарының немесе ресми қамқоршыларының рұқсатымен ғана жүзеге асырылады.

Бұл туралы Orda.kz.хабарлайды.

ҚР Денсаулық сақтау министрлігі санитарлық-эпидемиологиялық бақылау комитетінің төрайымы Айжан Есмағамбетова Pfizer вакцинасы осы жылдың төртінші тоқсанында елге жеткізілуі мүмкін екенін айтты. Препарат 12 жастан асқан балаларға екпе салу  үшін қолданылады.

— Сондықтан, біз бүгін балаларды вакциналау мүмкіндігін қарастырып жатырмыз. Қазақстанда бұл  12-18 жастағы  екі миллионға жуық баланы қамтиды. Бұл ауқымды көрсеткіш. Өкінішке қарай, бүгінде балалардың  жиі ауыратындығы белгілі. Енді біздің алдымызда ересектерді ғана емес, балаларды да қорғау міндеті тұр. Балаларға вакцина тек ата-аналарының немесе ресми қамқоршыларының рұқсатымен жасалады, - деді Есмағамбетова.

Ол сонымен қатар Денсаулық сақтау министрлігі вакцинаны Қазақстанға жеткізуге дайын барлық компаниялармен, соның ішінде Sinopharm және Moderna-мен келіссөздер жүргізіп жатқанын айтты.

— Біз келіссөздер жүргіземіз, олардың талаптарын, бізге қаншалықты сәйкес келетінін анықтаймыз. Сондай-ақ, біз белгілеген топты вакциналау үшін біздің елге жеткізу қажеттілігі арта түсті. Вакцина жеткізуге дайын барлық өндірушілермен келіссөздер жүргізілуде, - деді эпидемиолог.

Қазіргі уақытта Қазақстанда COVID-19-қа қарсы  вакцинаның үш түрі қолданылады, олар — Sputnik-V, QazVac және CoronaVac. Алайда бұл дәрі-дәрмектер Еуропалық Одақ пен АҚШ-та мақұлданбаған.