Қазақстанда жынысын ауыстырғысы келетіндер көбейіп барады – андролог

Дәрігерлер соңғы 3 жылда жынысын ауыстыруға ниет білдіретіндердің көбейгенін айтты.

Астана телеарнасының мәліметіне сәйкес, отандық андролог дәрігер соңғы 2-3 жылда жынысын ауыстыруға қызығатындар көбейгенін мәлімдеді. Арнайы мамандарға кеңес сұрап келетіндердің де саны артқан. Маманның айтуынша, ер балада эстероген гормоны көбейсе, олар гендерлік өзгеріске ұшырайды. Дәрігерлер баланың бойындағы мұндай өзгерістерді емдеуге болады дейді.

– Көбінесе телефон арқылы, бірақ өздерінің жынысын ауыстырғысы келіп жүргендерін айтып жатыр. Көбінесе уатсапқа жазады. Қандай да бір өзгерістер болса, тезірек тексерткен дұрыс, - деді дәрігер-андролог Ернұр Исабекұлы

Психологтар ер азаматтардың бұл жолға түсуіне әйелдердің өзіне тым сенімділігі себеп болып отырғанын айтты. Отбасында анасы баласының көзінше әкесін жоғары бағалап, құрмет көрсеткені дұрыс. Сонда ер бала әкеге еліктейді. Әйелдердің бар жауапкершілікті өзіне алуы да бала тәрбиесі үшін өте үлкен қателік.

– Қыз келіншектеріміз өз-өзіне тым сенімді. Отбасындағы ер адам рөлі төмендеп қалды. Көбінесе қыздардың қателігі. Солай балалар зардап шегіп отыр. Өйткені әкенің рөлін төмендетіп тастадық. Тағы бір себеп, танымалдыққа тез жету. Әлеуметтік желіде ашық жарияланып жатқан қызтекелерді көріп, осылай танымал болсам деген теріс ойлар да қалыптасатын көрінеді, - деді психолог Жаңагүл Тұрманова.