Қазақстанда жаңа оқу гранты ашылды

«Қазақстан халқына» қорына жоғары оқу орындарында оқу ақысын төлеуде үлкен қиындықтарға тап болған жастардан, студенттерден 1,5 мың өтініш келіп түскен.

«Қазақстан халқына» қоғамдық қорының төрағасы Болат Жәмішев еліміздің жоғары оқу орындарында қор құрған білім гранттарына кімдер қатыса алатынын айтты.

«Оларға қалай көмектесеміз деп ойладық, шешім қабылданды, қамқоршылық кеңес ауыл мектептерінің түлектеріне, аз қамтылған отбасылардан шыққан, оқу ақысын төлеуде қиналғандарға гранттық бағдарламаны бекітті. Бұл грантқа жетім және мүгедек балалар да құжат тапсыра алады» деді Болат Жәмішев.

Оның айтуынша, бюджет есебінен гранттық бағдарламалар бойынша Білім министрлігімен бірлесе жұмыс істейтін әрбір университетке үш грант бөлінеді.

Негізгі талап – үміткер мемлекеттік грантқа ие болу үшін жеткілікті балл жинауы керек.

«Біз университет басшыларымен бірге әзірлеген критерийлерге сәйкес келетіндер бұл грантты алуға құқылы болады. Бізде 85 университет, бір университетке 3 грант (бакалавриат бағдарламасы). Сонымен қатар, жоғары оқу орындарында оқитын студенттерге сол қажеттілік критерийлері бойынша 100 шәкіртақы тағайындап қойдық. Бірақ бұл үміткерлерді осы салада жұмыс істейтін және студент жастарға белгілі қайырымдылық ұйымдары таңдайды. Биылғы бағдарлама бюджеті 378 млн теңгені құрайды. Жылдан-жылға ол өседі» деп түйіндеді қор басшысы.

Еске салсақ, мемлекет басшысының тапсырмасымен 2022 жылдың қаңтарында «Қазақстан халқына» қоғамдық әлеуметтік қоры құрылды. Ол денсаулық сақтау, білім беру және әлеуметтік қолдау салаларындағы нақты мәселелермен айналысады.