Қазақстанда зейнет жасына дейінгі адамдарды жұмыспен қамту бағдарламасы іске қосылады

Қазақстанда зейнет жасына дейінгі жұмыссыздарды жұмыспен қамтамасыз ететін болады. Осы мақсатта Еңбек және халықты әлеуметтік қорғау министрлігі «Күміс жас» жобасын қолға алуда, деп хабарлады ведомствоның баспасөз қызметі.

«Күміс жас» жобасы бойынша жұмыс тұрақты қызмет орындарынан тыс құрылуы керек.

Оларды ауыр жұмыстарда, еңбек жағдайлары зиянды және қауіпті жұмыстарда, кәсіптердің ұлттық жіктеуішіне сәйкес біліктілігі төмен жұмысшылардың тоғызыншы тобына жататын кәсіптерде құруға болмайды.

«Күміс жас жобасына қатысу мерзімі 12 айдан аспайды. Қатысу кезеңінде халықты жұмыспен қамту орталығы зейнетк жасына дейінгі адамның жалақысының бір бөлігін бюджет қаражаты есебінен субсидиялайды» деді министрлік.

Жалақыны субсидиялаудың ай сайынғы мөлшері жалақының 50%-ын құрайды. Бірақ 30 АЕК-тен аспайды (91 890 теңге) – салықтарды, міндетті әлеуметтік аударымдарды, пайдаланылмаған еңбек демалысы үшін өтемақыларды және экологиялық жәрдемақылар бойынша төлемдерді қоспағанда, банктік қызметтерді қоса алғанда.

Қатысу мерзімі аяқталғаннан кейін жұмыс беруші зейнет жасына дейінгі адамды зейнеткерлікке шыққанға дейін тұрақты жұмысқа орналастырады.

Күміс жас жобасына қандай кәсіпорындар қатыса алады?

«Біріншіден, бұл бір жылдан астам жұмыс істеп келе жатқан және тұрақты салық және басқа да әлеуметтік аударымдарды жүзеге асыратын, сондай-ақ жалақы бойынша мерзімі өткен берешегі жоқ барлық меншік нысанындағы кәсіпорындар мен ұйымдар» деп хабарлады Еңбек министрлігі.

Бұл бастама кәсіпкерлікті дамытудың 2021-2025 жылдарға арналған ұлттық жобасы аясында жүзеге асырылуда.

Жоба жыл сайын 5000 адамға жетеді деп күтілуде. Қазіргі уақытта заңнамалық актілермен жұмыс істеп жатырмыз.