Қазақстандағы орыс тілділер арашаға мұқтаж емес!

Республикалық «Орыс, славян және казак ұйымдарының қауымдастығы» елге «Ресей офицерлері» ұйымының келу қажеттілігі жоқ деп мәлімдеді.

Бұл туралы Orda.kz хабарлады.

Қауымдастық басшысы, Мәжілістің бұрынғы вице-спикері Владимир Божко Қазақстанда ұлттық және діни белгілері бойынша орыс тілділерге ешкім шабуыл жасамағанын және ұрмағанын айтып берді:

— Қауымдастық басшысы ретінде біздің елімізде діни және ұлттық негізде орыс тілді азаматтарға шабуыл жасау немесе ұрып-соғу фактілері жоқ екенін мәлімдеймін! Мұндай негізсіз мәлімдемелер шындыққа жанаспайды. Сонымен қатар «Ресей офицерлер одағы» мәлімдемесі қоғамдық бірлестікті қорлап қана қоймай, Қазақстан-Ресей достығы мен стратегиялық әріптестігіне нұқсан келтіреді, - деді.

Божко Ресей ұйымына жекелеген арандатушылық пиғылдағы бейнежазбалар бүкіл халықтың орыс тілді азаматтарға деген көзқарасын көрсетпейді деп сендірді.

— Жоғарыда айтылғандарды ескере отырып, сіздердің Қазақстандағы ұлттар арсындағы қатынастарға «жәрдемдесуге» және араласуға ешқандай қажеттілік жоқ, — деп түйіндеді Божко.