Қазақстанда тұрғын үй саясаты қалай өзгереді?

Үкімет отырысында Индустрия және инфрақұрылымдық даму министрі Қайырбек Өскенбаев тұрғын үй саясатындағы жаңа тәсілдер туралы айтты.

«2021 жылдың соңында республика бойынша 17,1 млн шаршы метр жаңа тұрғын үй салынды. Бұл 151 мың азаматтың тұрмыс жағдайын жақсартуға мүмкіндік берді. Тұрғын үй құрылысына құйылған инвестиция өткен жылдың сәйкес кезеңімен салыстырғанда 19,1 пайызға өсіп, 2,4 трлн теңгені құрады. Биылдан бастап біз жер ресурстарын тиімді пайдалану, жол желісін дамыту және құрылыс сапасын арттыру арқылы ықшам және жан-жақты ғимарат құру арқылы «шаршы метрлерді салудан» жайлы өмір сүру ортасын қалыптастыруға көшуді жоспарлаймыз» деді Индустрия және инфрақұрылымдық даму министрі Қайырбек Өскенбаев.

Оның айтуынша, азаматтардың тұрғын үй мәселелерін шешудің негізгі тәсілдері субсидиялар арқылы мемлекеттік қолдаудың жаңа тетіктері, жалға берілетін тұрғын үй үшін тұрғын үй төлемдері, құрылыс салушылардан дайын тұрғын үй сатып алу, «ескі орамдарды» жөндеу, проблемалық нысандарды аяқтау болады.

«Осыны ескере отырып, біз биылғы жылға тұрғын үйді пайдалануға берудің сол жылдық көлемін – 17 млн шаршы метрді анықтауды ұсынып отырмыз» деді министр.

Бұл ретте ол қазіргі таңда құрылыс саласында 46 476 кәсіпорын жұмыс істейтінін, оның ішінде құрылыс материалдарын өндіруде 2 472 кәсіпорын, 641 000 жұмысшы мен маман жұмыспен қамтылғанын қосты.

«Біз аладғы уақытта жұмыс орындарын сақтау және көбейту саясатын жалғастырамыз. Сонымен қатар, баспананың қолжетімділігін қамтамасыз ету, оның құнының өсуіне жол бермеу және халықтың өмір сүру сапасын жақсарту біздің министрліктің негізгі мақсаттары болмақ» дейді Қайырбек Өскенбаев.