Қазақстанда ресейлік кәсіпкерлер клубы пайда болды

20 мамырда Нұр-Сұлтанда бірқатар ресейлік компаниялар мен ресейлік-қазақстандық бірлескен кәсіпорындардың өкілдері кірген ресейлік кәсіпкерлердің бейресми клубы ашылып, бірінші отырысы өтті.

Бұл туралы ақпарат Ресейдің Қазақстандағы елшілігінің Instagram желісінде жарияланды. Іс-шара Ресей елшілігінің, Қазақстандағы сауда өкілдігінің, Нұр-Сұлтандағы орыс үйінің, сондай-ақ Мәскеу бизнес орталығы әкімшілігінің қолдауымен өткені хабарланды.

«Өзінің құттықтау сөзінде Ресейдің Қазақстандағы Елшісі Алексей Бородавкин бұл клуб ресейлік шағын және орта бизнес өкілдерінің Қазақстанда бизнес жүргізу мәселелері бойынша бейресми қарым-қатынас алаңы ретінде әрекет ететінін, сондай-ақ өкілдер туындауы мүмкін қиындықтар мен проблемаларды талқылайтынын атап өтті. Мұнда ресейлік іскер топ өкілдері бар» делінген жазбада.

Клубтың негізінде оның мүшелеріне серіктестер табуға көмек көрсетіледі. Ал елшілік, сауда өкілдігі және басқа да ресейлік шетелдік мекемелер өз тарапынан олардың табысты болуы үшін тұрақты қолдау көрсетуді жалғастырады.

Клуб өз қаражаты есебінен жұмыс істейтін болады: қатысушылар ай сайын жалпы қорға 20 мың теңгедей ақша аударады. Клубтың бірінші отырысының қорытындысы бойынша оның президенті болып елші Бородавкин, атқарушы директоры болып сауда өкілі Андрей Бабко сайланды.